दि २७ कल्याण :कोळसेवाडी पोलीस ठाणे हद्दीतून चोरीस गेलेली हिरो कंपनीची एक्सट्रीम १२५ आर मोटारसायकल अवघ्या काही दिवसांत शोधून काढत पोलिसांनी आरोपीला अटक केली असून, सुमारे ५५ हजार रुपये किमतीची मोटारसायकल हस्तगत करण्यात आली आहे. या कारवाईमुळे वाहनचोरीच्या घटनांना आळा बसण्यास मदत होणार आहे.
दि २१ डिसेंबर २०२५ रोजी सायंकाळी ५.३० ते २३ डिसेंबर २०२५ रोजी दुपारी १२.३० या कालावधीत, आर.डी. बार, शिळफाटा रोड, कल्याण पूर्व येथील पार्किंगमधून एम.एच.-०५-एफ.एन.-१०४३ क्रमांकाची एक्सट्रीम १२५ आर मोटारसायकल अज्ञात चोरट्याने चोरून नेली होती. याप्रकरणी फिर्यादीच्या तक्रारीवरून कोळसेवाडी पोलीस ठाण्यात गु.रजि. नं. ९१४/२०२६, भा.न्या.सं. २०२३ चे कलम ३०३(२) अन्वये गुन्हा दाखल करण्यात आला होता.
गुन्ह्याच्या तपासादरम्यान घटनास्थळी मिळालेल्या सीसीटीव्ही फुटेज आणि गोपनीय माहितीच्या आधारे पोलिसांनी आरोपीची ओळख पटवली. त्यानुसार धनेश्वर नारायण महतो (वय ३०), रा. भराडी आई बिल्डिंग, रूम नं. २१६, जिमखाना रोड, आजदे गाव, डोंबिवली पूर्व यास अटक करण्यात आली. आरोपीकडून चोरीस गेलेली एक्सट्रीम मोटारसायकल (एम.एच.-०५-एफ.एन.-१०४३) हस्तगत करण्यात आली आहे.
ही कारवाई पोलीस उप आयुक्त (परिमंडळ-३, कल्याण) अतुल झेंडे व सहाय्यक पोलीस आयुक्त (कल्याण विभाग) कल्याणजी घेटे यांच्या मार्गदर्शनाखाली, कोळसेवाडी पोलीस ठाण्याचे पोलीस निरीक्षक गणेश न्हायदे यांच्या सूचनेनुसार करण्यात आली. गुन्हे प्रकटीकरण पथकातील सहाय्यक पोलीस निरीक्षक संदिप भालेराव, पो.हवा. ५०३ विशाल वाघ, पो.हवा. ६९३० गोरखनाथ घुगे, पो.हवा. २२८३ सचिन आव्हाड, पोना. ४५७ दिलीप कोती आणि पोशि. ३६०१ राहुल खरे यांच्या पथकाने ही यशस्वी कारवाई केली.
