डोंबिवली :विष्णुनगर पोलीस ठाणे हद्दीतील मानकोली ब्रिज परिसरात धोकादायक स्टंटबाजी करून सोशल मीडियावर रील पोस्ट करणाऱ्या तिघा तरुणांवर पोलिसांनी कडक कारवाई केली आहे. ही कारवाई ७ एप्रिल २०२६ रोजी घडलेल्या घटनेच्या अनुषंगाने करण्यात आली.
पोलीसांनी दिलेल्या माहितीनुसार, गणेश राजू फोंडा रेड्डी (वय २२, रा. राम मंदिर, डोंबिवली पश्चिम), कबीर मच्छिंद्र नेतकर (वय २२, रा. टेल्कोसवाडी, कोपर रोड, डोंबिवली पश्चिम) आणि यश नितेश मालवणकर (वय २३, रा. सायली निवास बिल्डिंग, डोंबिवली पश्चिम) यांनी होंडा अॅक्टिवा (क्र. MH 05 EU 8768) या दुचाकीवर ट्रिपल सीट बसून मानकोली ब्रिजवर धोकादायक पद्धतीने वाहन चालवत स्टंट केले.
या प्रकाराचा व्हिडिओ त्यांनी इन्स्टाग्रामवर पोस्ट केला होता.
ही बाब समोर येताच विष्णुनगर पोलिसांनी तात्काळ हालचाल करत संबंधित तरुणांचा शोध घेत त्यांना पोलीस ठाण्यात हजर केले. त्यांच्यावर मोटार वाहन कायद्यान्वये कलम १८४ (धोकादायक वाहन चालवणे), १२८ (ट्रिपल सीट) व १२९ (हेल्मेट न वापरणे) अंतर्गत गुन्हा दाखल करण्यात आला आहे.तसेच संबंधित दुचाकी ट्रॅफिक पोलिसांच्या मदतीने जप्त (इंपाऊंड) करण्यात आली आहे.
