दि. १(डोंबिवली ):डोंबिवली शहर आणि परिसरात अवैध ऑनलाईन लॉटऱ्या जोरात चालू आहेत. पण डोंबिवलीतील स्थानिक पोलीस या अवैध, दोन नंबरच्या धंद्यांकडे कानाडोळा करताना दिसत आहेत. दिवस रात्र या लॉटऱ्याच्या दुकानात सामान्य माणसांची गर्दी पाहायला मिळते.
डोंबिवलीतील मानपाडा पोलीस स्टेशनच्या हद्दीत तर लॉटरी माफिया शंकर अहुजा याने स्वतःचा अॅप तयार करून ऑनलाईनच्या नावाखाली बेकायदेशीरपणे लॉटरीचा गोरख धंदा सुरू केला आहे. यामुळे सरकारचा कोट्यवधी रूपयांचा महसूल बुडवला जात आहे. तर दुसरीकडे लॉटरीच्या माध्यमातून केवळ माफियांनाच फायदा होत असल्याने लॉटरी खेळणारी अनेक कुटुंब देशोधडीला लागत चालली आहेत.
राज्यात ऑनलाइन लॉटरीवर बंदी असतानाही, त्यात मुंबईला अर्थसंकल्पीय अधिवेशन चालू आहे तरीही मानपाडा पोलीस स्टेशनच्या हद्दीत ऑनलाईन लॉटरी जोरात चालू आहे. अवैध ऑनलाईन लॉटऱ्या सुरु असल्याची सर्व माहिती मानपाडा पोलीस ठाण्याचे वरिष्ठ पोलीस निरीक्षक संदीपान शिंदे यांना माहिती आहे तरीही ते याकडे जाणीवपूर्वक दुर्लक्ष करत आहेत.
अवैध लॉटरी चालवणारा चालक मालक माफिया शंकर अहुजा ला वरिष्ठ पोलीस निरीक्षक संदीपान शिंदे पाठीशी घालत आहेत का? लॉटऱ्याचा धंदा करण्यासाठी खुलेआम मदत करत आहेत का? जर मदत करत नसतील तर अवैध लॉटरी चालवणारा चालक मालक माफिया शंकर अहुजा यावर कारवाई का होत नाहीये? असा प्रश्न नागरिकांना पडला आहे.
दिवसरात्र चालणाऱ्या या लॉटरीच्या नादात अनेक तरुण, नोकरदार, बिगारी काम करणारे, नशेच्या आहारी गेलेली लोक कमी वेळेत जास्त पैसे कमावण्याच्या आमिषाला बळी पडून आपली कष्टाची कमाई या जुगारात गमावत आहेत. याचा थेट परिणाम त्यांच्या कौटुंबिक जीवनावर होत असून, अनेक कुटुंबे रस्त्यावर आली आहेत.
या गंभीर प्रकाराकडे ठाणे आयुक्त, कल्याण उप आयुक्त, सहाय्यक पोलीस आयुक्त यांनी तातडीने लक्ष घालून, या अवैध लॉटरी सेंटर चालवणाऱ्या चालक मालक शंकर अहुजा याच्यावरती ताबडतोब कारवाई करावी तसेच त्याला मदत करणाऱ्या असलेल्या पोलीस अधिकाऱ्यांचीही चौकशी करून, दोषींवर कारवाई करण्यात यावी अशी मागणी जोर धरत आहे.
