कल्याण:कल्याण परिमंडळ-३ अंमली पदार्थ विरोधी पथकाची धडाकेबाज कारवाई करत तब्बल ३४ कोटी १८ लाख ८४ हजार रुपयांचे ९ किलो ७६८ ग्रॅम “हेरॉईन (गर्द)” जप्त करण्यात आले असून मुख्य पुरवठादारासह पाच आरोपींना पोलिसांनी जेरबंद केले आहे. स्मशानभूमीजवळ संशयास्पद हालचाली करणाऱ्या दोन इसमांना ताब्यात घेतल्यानंतर या आंतरजिल्हा ड्रग्ज रॅकेटचा पर्दाफाश झाला.
या कारवाईत कासिम अब्दुल सत्तार वसईकर, कृष्णा नागप्पा हळेमणी, अमजद युसुफ पठाण, गणेशन पुथुस्वामी जंगमार उर्फ अण्णा आणि सद्दाम गफुर शेख या पाच आरोपींना अटक करण्यात आली आहे. आरोपींकडून जप्त करण्यात आलेल्या “गर्द”ची किंमत तब्बल ३४ कोटींपेक्षा अधिक असल्याने कल्याण परिसरात मोठी खळबळ उडाली आहे.
तपासादरम्यान मुख्य सूत्रधार अमजद पठाण याच्याकडून मुंबई, कल्याण आणि नाशिक परिसरात अंमली पदार्थांचा पुरवठा होत असल्याचे निष्पन्न झाले. विशेष म्हणजे आरोपी अमजद पठाण याच्यावर खून, एमसीओसीए, एनडीपीएससह गंभीर गुन्ह्यांची मालिका असल्याचेही उघड झाले आहे.
ही कारवाई पोलिस आयुक्त ठाणे शहर आशुतोष डुंबरे, पोलिस सह आयुक्त ज्ञानेश्वर चव्हाण, अप्पर पोलिस आयुक्त संजय जाधव,कल्याण पोलिस उपायुक्त अतुल झेंडे आणि सहा पोलिस आयुक्त कल्याण विभाग अशोक होनमाणे यांच्या मार्गदर्शनाखाली पार पडली.
तसेच अंमली पदार्थ विरोधी कारवाई पथकातील सपोनि अनिल गायकवाड, ग्रेड पोलीस उपनिरीक्षक जितेंद्र ठोके, पोलीस हवालदार देवरे, पोलीस शिपाई राहुल शिंदे, अमित शिंदे, बिरपन, खांडेकर आणि खरसाण यांनी ही धडाकेबाज कारवाई यशस्वी केली. महात्मा फुले चौक पोलीस ठाणे आणि विशेष पथकाच्या संयुक्त मोहिमेमुळे कल्याणातील “गर्द”च्या काळ्या जाळ्याला मोठा हादरा बसल्याची चर्चा रंगली आहे.
