डोंबिवली : केडीएमसीकडे फेरीवाल्यांविरोधात तक्रार केल्याचा राग मनात धरून एका पत्रकाराला थेट “तुला बघून घेईल, लेडीज काय करू शकते हे दाखवते” अशी धमकी देण्यात आल्याची धक्कादायक घटना डोंबिवली पोलीस ठाणे आवारातच घडली आहे. याप्रकरणी डोंबिवली पोलीस ठाण्यात अदखलपात्र गुन्हा (NCR) दाखल करण्यात आला आहे.
मिळालेल्या माहितीनुसार, पत्रकार विनोद प्रेमनारायण गिरी यांनी केडीएमसीकडे फेरीवाल्यांविरोधात तक्रार केली होती. याचाच राग मनात धरून छाया अमोल खिल्लारे हिने १२ मे रोजी रात्री सुमारे १० वाजण्याच्या सुमारास डोंबिवली पोलीस ठाणे परिसरात गिरी यांना धमकी दिल्याचा आरोप करण्यात आला आहे.
या प्रकरणी भारतीय न्याय संहिता (BNS) कलम 351(2) अंतर्गत डोंबिवली पोलीस ठाण्यात एनसीआर क्रमांक 1708/2026 दाखल करण्यात आला आहे.
पोलीस ठाण्याच्या आवारातच पत्रकाराला धमकावण्याचा प्रकार घडल्याने कायदा-सुव्यवस्थेवर प्रश्नचिन्ह निर्माण झाले असून, फेरीवाला लॉबी इतकी बेधडक झाली आहे का? असा सवाल आता उपस्थित केला जात आहे.
