डोंबिवली : देविचापाडा येथील खाडीकाठी झालेल्या निर्घृण खून प्रकरणातील तब्बल अडीच वर्षांपासून फरार असलेल्या आरोपीला विष्णुनगर पोलिसांनी नाट्यमय कारवाई करत नांदेड जिल्ह्यातून अटक केली आहे. पोलिसांना सतत ठिकाणे बदलून गुंगारा देणारा आरोपी अखेर वेशांतर करून रचलेल्या सापळ्यात अडकला.
२७ नोव्हेंबर २०२३ रोजी देविचापाडा, स्मशानभूमीमागील खाडीकाठ परिसरात एका अनोळखी इसमाचा रक्तबंबाळ मृतदेह आढळून आला होता. तपासाअंती मृताची ओळख सोमनाथ बाबू शिंदे अशी पटली. किरकोळ वादातून दगडाने डोक्यात मारहाण करून त्याची हत्या केल्याचे उघड झाले होते.
या प्रकरणात यापूर्वी दोन आरोपींना अटक करून दोषारोपपत्र दाखल करण्यात आले होते. मात्र मुख्य साथीदार दिपक साहेबराव करकडे हा गुन्ह्यानंतर फरार होऊन विविध ठिकाणी वास्तव्य बदलत पोलिसांना चकवा देत होता.
वरिष्ठ अधिकाऱ्यांच्या मार्गदर्शनाखाली विष्णुनगर पोलिसांनी सातत्याने बातमीदारांचे जाळे सक्रिय ठेवत आणि मोबाईल क्रमांकांचे तांत्रिक विश्लेषण करत आरोपीचा माग काढला. अखेर २४ एप्रिल २०२६ रोजी नांदेड जिल्ह्यातील वाटेगाव येथे वेशांतर करून सापळा रचत पोलिसांनी आरोपीला शिताफीने ताब्यात घेतले.
या धडाकेबाज कारवाईमुळे विष्णुनगर पोलिसांच्या चिकाटीचे सर्वत्र कौतुक होत असून, “गुन्हेगार कितीही पळाला तरी कायद्याच्या हातातून सुटू शकत नाही,” हे पुन्हा एकदा सिद्ध झाले आहे.
