दि.२३ कल्याण :खडकपाडा पोलीस स्टेशन हद्दीत भरधाव वेगात स्टंटबाजी आणि रेसिंग करणाऱ्या कारचालकाने अॅक्टिवा चालकाला धडक देऊन गंभीर जखमी केल्याची धक्कादायक घटना उघडकीस आली आहे. पोलिसांनी केवळ ४८ तासांत आरोपीस वाहनासह ताब्यात घेत ठोस कारवाई केली आहे.
दि. १८ फेब्रुवारी २०२६ रोजी रात्री सुमारे ११ वाजता नवीन वडवली रोड, भंडारी चौकाकडे जाणाऱ्या मार्गावर अज्ञात चारचाकी वाहनाने भरधाव वेगात अॅक्टिवा क्र. एमएच ०५ सीएन ०२६३) ला मागून जोरदार धडक दिली. या अपघातात अॅक्टिवा चालकाच्या डोक्याला व उजव्या हाताला गंभीर दुखापत झाली.
जखमींच्या मुलाने दि. १९ फेब्रुवारी रोजी खडकपाडा पोलीस ठाण्यात तक्रार दाखल केली. त्यानुसार गु.रं.नं. ९१/२०२६ भा.न्या.सं. ११०, २८१, १२५ (अ)(ब) तसेच मोटार वाहन कायदा कलम १३४(२)(ब), १८४ अन्वये गुन्हा नोंद करण्यात आला.
अपघातानंतर आरोपीने कोणतीही वैद्यकीय मदत न करता घटनास्थळावरून पळ काढला होता. सुरुवातीला कोणताही ठोस पुरावा नसतानाही पोलिसांनी सीसीटीव्ही फुटेज, प्रत्यक्षदर्शी साक्षीदार व तांत्रिक तपासाच्या आधारे आरोपीचा माग काढला.
तपासादरम्यान आरोपी मनीष सतीश मनवानी (कार क्र. एमएच ०५ जीडी ११११) यास ताब्यात घेण्यात आले. तपासात धक्कादायक बाब समोर आली की, संबंधित कारसह आणखी दोन कार (एमएच ०५ एएक्स ७०११ व एमएच ०४ एफएम ९९९) रात्रीच्या वेळी नवीन वडवली रोडवर रेसिंग आणि स्टंटबाजी करत होत्या. त्याचदरम्यान हा अपघात घडला. दोन्ही इतर वाहनचालकांवरही स्वतंत्र गुन्हे दाखल करण्यात आले आहेत ठाणे शहर पोलीस आयुक्तालयाने नागरिकांना पुढील आवाहन करण्यात आले आहेत:
१)अल्पवयीन मुलांना वाहन चालविण्यास देऊ नये,
२)वाहतूक नियमांचे काटेकोर पालन करावे,
३)वेगमर्यादा ओलांडू नये
४)रस्त्यावर स्टंटबाजी किंवा रेसिंग करू नये
ही कारवाई ठाणे शहर पोलीस आयुक्तालय यांच्या मार्गदर्शनाखाली खडकपाडा पोलीस ठाण्यातील डीबी पथकाने केली.
