कल्याण, दि. २८ — कोळसेवाडी पोलीस ठाण्याच्या हद्दीत घडलेल्या वाहनफोडी व चोरीच्या घटनेचा वेगाने तपास करत पोलिसांनी उल्लेखनीय कामगिरी बजावत अवघ्या सहा तासांत आरोपीला अटक केली असून चोरीस गेलेला लॅपटॉपही हस्तगत केला आहे.
दि.२७ रोजी रात्री ७.३० ते दि. २८ रोजी सकाळी ८.०० वाजेच्या सुमारास, रेजेन्सी पार्क परिसरात, चक्कीनाका, कल्याण (पूर्व) येथे पार्क केलेल्या हुंडाई आय-२० (क्रमांक एम.एच. ०५ सी.व्ही. ६४१०) या वाहनाची काच फोडून अज्ञात इसमाने वाहनातील काळ्या रंगाचा डेल कंपनीचा लॅपटॉप चोरून नेला होता. याच परिसरात उभ्या असलेल्या आणखी पाच वाहनांच्या काचा फोडून नुकसान करण्यात आले होते.
या घटनेप्रकरणी कोळसेवाडी पोलीस ठाण्यात गुन्हा रजिस्टर क्रमांक ४८/२०२६, भारतीय न्याय संहिता २०२३ चे कलम ३०५ (ब) व ३२४ (४) अन्वये गुन्हा दाखल करण्यात आला.
मा. वरिष्ठ पोलीस निरीक्षक हेमंत गुरव यांच्या मार्गदर्शनाखाली गुन्हे प्रकटीकरण पथकाने तपासाची सूत्रे हाती घेतली. घटनास्थळावरील सीसीटीव्ही फुटेज व गोपनीय माहितीच्या आधारे आरोपीची ओळख पटवून पोलिसांनी सापळा रचत आरोपी सुजल बाबासाहेब वाघचौरे (वय २१), रा. गोसावीपुरा, चक्कीनाका, कल्याण (पूर्व) याला अटक केली.
अटक केलेल्या आरोपीकडून सुमारे १८ हजार रुपये किमतीचा डेल कंपनीचा लॅपटॉप हस्तगत करण्यात आला आहे.
ही यशस्वी कारवाई मा. पोलीस उप आयुक्त, परिमंडळ-३, कल्याण अतुल झेंडे व सहाय्यक पोलीस आयुक्त कल्याण विभाग कल्याणजी घेटे यांच्या मार्गदर्शनाखाली पार पडली. तसेच पोलीस निरीक्षक (गुन्हे) गणेश न्हायदे यांच्या सूचनेनुसार सहाय्यक पोलीस निरीक्षक संदीप भालेराव यांच्यासह पोह ५०३ विशाल वाघ, पोह २१५ दत्तु जाधव, पोह ६९३० गोरखनाथ घुगे, पोह ४२० रोहित बुधवंत, पोह ६५९६ विलास जरग व पोलीस नाईक ४५७ दिलीप कोती यांच्या पथकाने ही कारवाई यशस्वी केली.
